Run All Night
റൺ ഓൾ നൈറ്റ് (2015)

പഴയ അധോലോക നായകനും ഗ്യാങ്സ്റ്ററുമായിരുന്ന ജിമ്മി കോൺലണ് ഒരു രാത്രിയിൽ സ്വന്തം മകന്റെ ജീവൻ രക്ഷിക്കാനായി, ആ നഗരം അടക്കിഭരിച്ചിരുന്ന അധോലോക നായകനും ഉറ്റചങ്ങാതിയുമായ ഷോൺ മഗ്വയറിനെതിരെ പടപൊരുതേണ്ടി വരുന്നു. ജിമ്മിയെ കുടുക്കാൻ വർഷങ്ങളായി കാത്തിരിക്കുന്ന ന്യൂയോർക്ക് സിറ്റി പോലീസിനും അതൊരു അവസരമായിരുന്നു.

ആ രാത്രിയിൽ ജിമ്മി കോൺലണെയും മകൻ മൈക്കൽ കോൺലണെയും ആ നഗരം മുഴുവൻ വേട്ടയാടുകയായിരുന്നു എന്നുപറയാം. സ്വന്തം മകന്റെ ജീവൻ രക്ഷിക്കണോ അതോ ഉറ്റ ചങ്ങാതിക്കൊപ്പം നിൽക്കണോ എന്ന ധർമ്മ സങ്കടത്തിൽ നിൽക്കുന്ന ജിമ്മിക്ക് ആ രാത്രി തന്റെ ജീവിതത്തിലെ ഏറ്റവും ദൈർഘ്യമുള്ള രാത്രിയായി അനുഭവപ്പെടുന്നു.
മകന്റെ ജീവൻ രക്ഷിക്കാൻ ഒരു രാത്രി മുഴുവൻ യുദ്ധം ചെയ്യേണ്ടിവരുന്ന ഒരു പിതാവിന്റെ പോരാട്ട കഥയാണ് 2015-ൽ പുറത്തിറങ്ങിയ ‘റൺ ഓൾ നൈറ്റ്’ (Run All Night) എന്ന അമേരിക്കൻ ആക്ഷൻ ത്രില്ലർ ചലച്ചിത്രത്തിന്റെ ഇതിവൃത്തം.

ത്രസിപ്പിക്കുന്ന ആക്ഷൻ രംഗങ്ങളും തീപ്പൊരി ഡയലോഗുകളുമുള്ള ചിത്രത്തിൽ ഒരു പിതാവും മകനും തമ്മിലുള്ള ആത്മബന്ധവും വൈകാരിക മുഹൂർത്തങ്ങളും മനോഹരമായി അവതരിപ്പിച്ചിരിക്കുന്നു.

കേന്ദ്ര കഥാപാത്രമായ ജിമ്മി കോൺലണായി ലിയാം നീസണും, വില്ലനായ ഷോൺ മഗ്വയറായി എഡ് ഹാരിസും മത്സരിച്ച് അഭിനയിച്ചിരിക്കുന്ന ചിത്രം ആക്ഷൻ ത്രില്ലർ സിനിമാ പ്രേമികൾക്ക് മികച്ചൊരു ദൃശ്യാനുഭവം സമ്മാനിക്കുന്നു. പ്രേഷകർക്കിടയിൽ സമ്മിശ്ര പ്രതികരണമുണ്ടാക്കിയ ചിത്രം ബോക്സ് ഓഫീസിൽ മികച്ച വിജയം നേടുകയുണ്ടായി.