To End All War: Oppenheimer & the Atomic Bomb
ടു എൻഡ് ഓൾ വാർ: ഓപ്പൻഹൈമർ & ദി അറ്റോമിക് ബോംബ് (2023)

“ഞാൻ ശക്തനായ കാലമാണ്, ലോകങ്ങളെ നശിപ്പിക്കാൻ പുറപ്പെടുന്ന നാശത്തിന്റെ ഉറവിടം.”

ആറ്റം ബോംബിന്റെ പിതാവ് എന്നറിയപ്പെടുന്ന ലോകം കണ്ട മികച്ച ഭൗതികശാസ്ത്രജ്ഞരിൽ ഒരാളായ ജൂലിയസ് റോബർട്ട്‌ ഓപ്പൻഹൈമർ അദ്ദേഹത്തിന്റെ ഏറ്റവും വലിയ കണ്ടുപിടുത്തത്തെ വിവരിക്കാൻ കടമെടുത്ത വരികളാണ് ഇത്.
ഓപ്പൺഹൈമറുടെ ജീവിതത്തിൽ സംഭവിച്ച പ്രധാന കാര്യങ്ങളെ അവലോകനം ചെയ്യുന്ന ഈ വർഷം റിലീസായ ഡോക്യുമെന്ററിയാണ് ടു എൻഡ് ഓൾ വാർ: ഓപ്പൻഹൈമർ & ദി അറ്റോമിക് ബോംബ്. നോളൻ സംവിധാനം ചെയ്ത ഓപ്പൻഹൈമർ എന്ന ചിത്രം കണ്ടവർക്ക് സംശയദൂരീകരണത്തിനായും, കാണാൻ പോകുന്നവർക്ക് കഥയെ അറിഞ്ഞ് മികച്ച രീതിയിൽ സിനിമ ആസ്വദിക്കാനും വളരെ സഹായകരമാകുന്ന ഒന്നാണ് ഈ ഡോക്യുമെന്ററി.

ഓപ്പൻഹൈമറെ കുറിച്ച് അക്കാലത്ത് വന്ന വാർത്തകൾ, അദ്ദേഹം കൊടുത്ത ഇന്റർവ്യൂകൾ, ബോംബ് സ്ഫോടനത്തെ അതിജീവിച്ചവരുടെ വെളിപ്പെടുത്തലുകൾ, മാധ്യമ ശാസ്ത്ര സാങ്കേതിക രംഗത്ത് പ്രശസ്തിയാർജ്ജിച്ച പലരുടെയും അഭിപ്രായങ്ങളും കണ്ടെത്തലുകളും എല്ലാം ഒരുമിച്ച് ചേർത്ത ഈ ഡോക്യൂമെന്ററി ഒന്നര മണിക്കൂർ സമയം കൊണ്ട് അന്നത്തെ പ്രധാന സംഭവവികാസങ്ങളുടെ ഒരു നേർചിത്രം വരച്ചിടുന്നുണ്ട്. തീർച്ചയായും എല്ലാവരും കണ്ടിരിക്കേണ്ട ഒരു വർക്ക്‌ എന്ന് തന്നെ പറയാം.