Hard Hit
ഹാർഡ് ഹിറ്റ് (2021)

ഏറെ നാളത്തെ കാത്തിരിപ്പിനൊടുവിൽ The K2, ബാക്ക്സ്ട്രീറ്റ് റൂക്കി, ഹീലർ എന്നിവയിലൂടെ കൊറിയൻ പ്രേമികൾക്കിടയിൽ തരംഗം സൃഷ്ടിച്ച ജീ ചാങ്-വൂക് അഭിനയിച്ച് 2021 ൽ കൊറിയയിൽ പുറത്തിറങ്ങിയ ചിത്രമാണ് ഹാർഡ് ഹിറ്റ് A.K.A റെസ്ട്രിക്റ്റഡ് കോൾ. കോവിഡ് നിയന്ത്രണങ്ങൾക്കിടയിലും ബോക്സ് ഓഫീസിൽ വമ്പൻ വിജയം നേടിയ ചിത്രം 2021 ലെ ടോപ്പ് ചിത്രങ്ങളുടെ പട്ടികയിൽ ഇടം നേടി.

മക്കളെ സ്‌കൂളിൽ വിട്ട് ജോലിക്ക് പോകാൻ ഇറങ്ങിയ ബാങ്ക് മാനേജറായ സങ് ക്യൂവിന് കാറിൽ വെച്ച്, പണം ആവശ്യപ്പെട്ട് കൊണ്ടുള്ള ഒരു അജ്ഞാതന്റെ ബോംബ് ഭീഷണി കോൾ വരുന്നു. ആദ്യം ഒരു തമാശ പോലെ തള്ളിക്കളഞ്ഞെങ്കിലും പെട്ടെന്ന് തൊട്ടു മുന്നിലുള്ള ഒരു കാർ പൊട്ടിത്തെറിക്കുന്നു. അപ്പോഴാണ് കാര്യങ്ങളുടെ ഗൗരവം സങ് ക്യൂവിന് മനസ്സിലാകുന്നത്. അവിടുന്നങ്ങോട്ട് അക്ഷരാർത്ഥത്തിൽ, ബുസാൻ നഗര വീഥിയിലൂടെ ജീവിതത്തിനും മരണത്തിനും ഇടയിൽ, നായകനും വില്ലനും തമ്മിലുള്ള ഒരു ക്യാറ്റ് ആൻഡ് മൗസ് ചേസ് ആണ് ചിത്രത്തിൽ ആവിഷ്കരിച്ചിരിക്കുന്നത്.

കാർ ചേസും ചടുലമായ ആക്ഷൻ രംഗങ്ങളും മികച്ച അഭിനയ മുഹൂർത്തങ്ങളും കൊണ്ട് നിറഞ്ഞ സിനിമ, വിരലിൽ എണ്ണാവുന്ന കുറച്ചു കഥാപാത്രങ്ങളെ മാത്രം വെച്ചു കൊണ്ട് ആദ്യാവസാനം വരെ പ്രേക്ഷകനെ മുൾമുനയിൽ നിർത്തുന്നതാണ്. 2021 ൽ ഇറങ്ങിയ ഏറ്റവും മികച്ച എഡ്ജ് ഓഫ് സീറ്റ് കൊറിയൻ ത്രില്ലർ എന്ന് പറയാവുന്ന സിനിമ, അതിനൊപ്പം തന്നെ കൊറിയയിലെ ഈ വർഷത്തെ ബോക്സ് ഓഫീസ് ടോപ്പറുകളിൽ ഒന്ന് കൂടിയാണ്.