New Boy
ന്യൂ ബോയ് (2007)

ആഫ്രിക്കൻ വൻകരയിൽനിന്നും അയർലൻഡിലെ വിദ്യാലയത്തിലേക്കു മാറാൻ നിർബന്ധിതനായ ഒമ്പതുവയസ്സുകാരനിൽനിന്നാണ് ‘ന്യൂ ബോയ്‘ എന്ന കൊച്ചുചിത്രം ആരംഭിക്കുന്നത്. പുതിയ വിദ്യാലയത്തിലെത്തുന്ന ജോസഫിന്റെ ആദ്യദിവസത്തെ അനുഭവങ്ങളിലൂടെ ചിത്രം മുന്നോട്ടുനീങ്ങുന്നു. ആ സമയങ്ങളിൽ ജോസഫിനുണ്ടാകുന്ന ഭൂതകാലസ്മരണകളെ വളരെ സമർത്ഥമായി സംയോജിപ്പിച്ചിരിക്കുന്നതായും നമുക്കു കാണാൻ കഴിയും.

ബുള്ളീയിംഗും റേസിസവുമൊക്കെ വിഷയമായി വരുന്നുണ്ടെങ്കിലും ചിത്രം ആത്യന്തികമായി മുന്നോട്ടുവെക്കുന്ന ആശയമെന്നത് കുട്ടികളുടെ പൊതുവായുള്ള താല്പര്യങ്ങളെ മുൻനിർത്തി അവരുണ്ടാക്കിയെടുക്കുന്ന സൗഹൃദങ്ങളാണ്. ഐറിഷ് സാഹിത്യകാരനായ റോഡി ഡോയലിന്റെ ചെറുകഥയെ ആധാരമാക്കി 2007-ൽ പുറത്തിറങ്ങിയ ഹ്രസ്വചിത്രം ആ വർഷത്തെ മികച്ച ലൈവ് ആക്ഷൻ ഷോർട്ട് ഫിലിം കാറ്റഗറിയിൽ ഓസ്കാറിനുള്ള നോമിനേഷൻ നേടിയിരുന്നു.