M
എം (1931)

M, 1931 ൽ പുറത്തിറങ്ങിയ ജർമൻ ചലച്ചിത്രമാണ്. കൊച്ചു പെൺകുട്ടികളെ തട്ടിക്കൊണ്ടുപോയി കൊല്ലുന്ന ഒരു കൊലപാതകിക്കായുള്ള അന്വേഷണം കൊടുമ്പിരി കൊണ്ടിരിക്കുകയാണ്. എട്ട് മാസമായി പൊലീസ് നടത്തുന്ന അന്വേഷണം ഫലം കാണുന്നില്ല. കൊള്ള സങ്കേതങ്ങളിലും ബാറുകളിലും വീടുകളിലും തെരുവുകളിലും എന്നു വേണ്ടാ പൊലീസ് അരിച്ചു പെറുക്കാത്ത ഒരു സ്ഥലവും ബാക്കിയില്ല. ഒടുവിൽ പൊലീസ് ഞെട്ടലോടെ ആ സത്യം തിരിച്ചറിഞ്ഞു. ചുറ്റും കാണുന്ന സാധാരണ മനുഷ്യരിൽ ആരും കൊലപാതകി ആകാം, ഒരു സ്ഥിരം കുറ്റവാളി ആകണമെന്നില്ല. ഒപ്പം, ഈ കൊലപാതകിയെ പിടിക്കാൻ,നമ്മൾ തീരെ പ്രതീക്ഷിക്കാത്ത ഒരു സംഘവും രംഗത്തിറങ്ങുന്നു. കുറ്റവാളികൾ സർക്കാർ ചിലവിൽ ജയിലുകളിൽ സുഖമായി കഴിയുന്നു എന്ന പൊതു വിമർശനം ആ കാലത്തു തന്നെ സജീവം ആയിരുന്നുവെന്ന് ചിത്രം തെളിയിക്കുന്നു. കൂടാതെ ക്യാമറ ആംഗിളുകളിലും ഷോട്ടുകളിലും സംവിധായകൻ നടത്തിയിരിക്കുന്ന പരീക്ഷണങ്ങൾ ഇക്കാലത്തെ ചലച്ചിത്രങ്ങളെ പോലും വെല്ലുന്നവയാണ്.