Open Your Eyes
ഓപ്പൺ യുവർ ഐസ് (1997)

സ്വപ്നത്തിനും യാഥാർഥ്യത്തിനും ഇടയിലൂടെ, ഒരു നൂൽപ്പാലത്തിലൂടെന്നവണ്ണം ഒരു യാത്ര. കണ്ടുകഴിഞ്ഞും ദിവസങ്ങളോ ആഴ്ചകളോ വിടാതെ പിന്തുടരുന്ന സിനിമ.

സുന്ദരനും സമ്പന്നനുമാണ് സ്വഭാവം കൊണ്ട് ഒരു പ്ലേബോയ് ആയ സെസാർ. ഒരു അപകടത്തെത്തുടർന്ന് മുഖം വികൃതമായതോടെ തകർന്നുപോയ ആ യുവാവിന്റെ ജീവിതത്തിലുണ്ടാകുന്ന അവിശ്വസനീയമായ സംഭവങ്ങൾ ആണ് ഈ സിനിമ. കാമുകി സോഫിയയും മുൻകാമുകി നൂരിയയും ഉറ്റസുഹൃത്ത് പെലായോയുമെല്ലാം അവന്റെ ജീവിതത്തെ തൊടുന്നുണ്ട്. ആ അനുഭവങ്ങളോരോന്നും സത്യമോ മിഥ്യയോ എന്ന് തിരിച്ചറിയാനാവാതെ പതറുമ്പോൾ അന്റോണിയോയുടെയും ഡുവർണോയ്‌സിന്റെയും വിരുദ്ധയുക്തികൾ അവനെ കൂടുതൽ ചിന്താക്കുഴപ്പത്തിലാക്കുന്നു.

പെനിലോപ് ക്രൂസ്, എഡ്വേർഡോ നോറീഗ എന്നിവർ നായികാനായകന്മാരായ ഈ അലഹാന്ദ്രോ അമെനബാർ ചിത്രം, 2001-ൽ ടോം ക്രൂയിസ് നായകനായി ‘വാനില സ്കൈ’ എന്ന പേരിൽ ഹോളിവുഡിൽ റീമേക്ക് ചെയ്തിരുന്നു. ഇൻസെപ്ഷൻ, ഷട്ടർ ഐലന്റ്, ദ പ്രെസ്റ്റീജ് തുടങ്ങിയ ചിത്രങ്ങൾ ഇഷ്ടപ്പെടുന്നവരെ അവയുടെ മുൻഗാമിയായ ഈ സ്പാനിഷ് ചിത്രം, ധാരാളിത്തത്തോടെയുള്ള ഹോളിവുഡ് ദൃശ്യ പരിചരണമില്ലെങ്കിൽ പോലും മിക്കവാറും നിരാശപ്പെടുത്തില്ല.