Take The Ball Pass The Ball
ടേക് ദി ബോൾ പാസ് ദി ബോൾ (2018)

ലോകമെമ്പാടും ഉള്ള കാല്പന്തു പ്രേമികളാൽ ഫുട്‌ബോൾ ചരിത്രത്തിലെ തന്നെ എക്കാലത്തേയും മികച്ച കൂട്ടം എന്ന വിശേഷണം നേടിയെടുത്ത ടീമാണ് പെപ് ഗ്വാർഡിയോള യുടെ ബാഴ്സ.

ആ 2008-12 കാലത്തെ മാസ്മരിക ബാഴ്സയുടെ കഥ പറയുന്ന ഡോക്യൂമെന്ററി ‘Take the Ball Pass the Ball’ നിർമിച്ചിരിക്കുന്നത് അറിയപ്പെട്ട സ്പാനിഷ് ഫുട്‌ബോൾ ജേർണലിസ്റ്റ് ഗ്രഹാം ഹണ്ടറിന്റെ , Barca- The Making of Greatest Team in the World, എന്ന പ്രശസ്ത ഗ്രന്ഥത്തെ ആധാരമാക്കിയാണ്.

Zoom സ്പോർട്സ് ന്റെ ബാനറിൽ ,ഡങ്കൻ മാക് മാത് സംവിധാനം ചെയ്ത ഡോക്യൂമെന്ററിയിൽ ,പെപ്പിന്റെ ബാഴ്സയിലെ ഏകദേശം എല്ലാ താരങ്ങളും, മുഖ്യ സ്റ്റാഫുകളും അണിനിരക്കുന്നു . കൂടെ മാഞ്ചസ്റ്റർ യുണൈറ്റഡ് , യുവന്റസ് കോച്ചുമാരും ,കളിക്കാരും , സജീവമായി കടന്നു വരുന്നു.

2008 ണ് മുമ്പുള്ള ബാഴ്സയിലേക്ക് ഇടക്ക് കണ്ണോടിക്കുന്ന ചിത്രം , ബാഴ്സയുടെ എക്കാലത്തെയും മഹത് വ്യക്തിത്വം യോഹാൻ ക്രൈഫിനെ പ്രത്യേകം എടുത്തു കാട്ടുന്നു. 2008 ൽ കോച്ചായെത്തിയ പെപ് ഗ്വാർഡിയോള യുടെ കീഴിൽ 4 വർഷം ലോക ഫുട്‌ബോൾ അടക്കി ഭരിച്ച ബാഴ്സയുടെ കഥകളിലേക്ക് നായകൻ, വില്ലൻ റോളുകളിൽ മൗറീഞ്ഞോ – ഗ്വാർഡിയോള ശത്രുതയും കടന്നു വരുന്നതോടെ ചിത്രം കാഴ്ചക്കാരെ ത്രില്ലടിപ്പിക്കുന്നു.

ഹണ്ടറിന്റെ ബുക്കിലെന്ന പോലെ വിഖ്യാത ബാഴ്സയുടെ ഓരോ ഘട്ടങ്ങൾ പറഞ്ഞു പോകുന്ന ഡോക്യൂമെന്ററി മെസ്സിയുടെ വളർച്ചയും , ക്രൈഫ് സംഭാവന ചെയ്ത ,ബാഴ്സയുടെ തനത് ഫിലോസഫി യുടെ ഭാവിയും ,അടുത്തടുത്ത ഭാഗങ്ങളിൽ ചിത്രീകരിക്കുന്നു. ഫൈനൽ വിജയങ്ങളുടെ സന്തോഷവും ,അബിദാലിന്റെ സന്തോഷ കണ്ണീരും ,പെപ് ന്റെ പടിയിറങ്ങലും എല്ലാമായി ,ഒരു ഇമോഷണൽ ചെപ്പ് തന്നെ ഈ ഡോക്യൂമെന്ററി നിങ്ങൾക്ക് സമ്മാനിക്കും എന്നുറപ്പാണ്.

ചിത്രത്തിന്റെ മറ്റൊരു പ്രത്യേകതയാണ് ,അതിന്റെ മ്യൂസിക് നിർവഹിച്ചിരിക്കുന്നത് ,ഡോക്യൂമെന്ററി യിലുടനീളം പ്രത്യക്ഷപ്പെടുന്ന ,pep ന്റെ ബാഴ്സയിലെ അംഗവും , പിന്നീട് സംഗീത ലോകത്തേക്ക് സഞ്ചരിക്കുകയും ചെയ്ത മാനുവൽ പിന്റോ ആണെന്നത്. വളരെ മികച്ച പ്രശംസ നേടിയ സംഗീത സംവിധാനം ഡോകുമെന്ററി യെ കൂടുതൽ ആകർഷകമാക്കുന്നു.