Army of Shadows
ആർമി ഓഫ് ഷാഡോസ് (1969)

ജർമൻ നാസികൾക്കെതിരെ ഫ്രഞ്ച് വിമതസേന നടത്തിയ പോരാട്ടങ്ങളിൽ പങ്കാളിയായിരുന്നു ജോസഫ് കെസൽ. അദ്ദേഹം 1943ൽ സ്വന്തം അനുഭവകഥകളും മറ്റു വിമതസേനാങ്കങ്ങളെ കുറിച്ചുള്ള കഥകളും കോർത്തിണക്കി എഴുതിയ പുസ്തകം ആണ് ആർമി ഓഫ് ഷാഡോസ് അഥവാ നിഴൽ സൈന്യം. ഈ പുസ്തകത്തിന്റെ ദൃശ്യാവിഷ്കാരമാണ് 1969ൽ പ്രശസ്ത ഫ്രഞ്ച് സംവിധായകൻ ഷോൺ പിയർ മെൽവീൽ അതേ പേരിൽ ഇറക്കിയത്. പതിവിനു വിപരീതമായി വിമതസേനയിലെ ആളുകൾക്ക് അന്ധമായ താരപരിവേഷം നൽകാതെ അവർ നേരിടേണ്ടി വന്നിരുന്ന യഥാർത്ഥമായ കടമ്പകളും ആശയറ്റ ജീവിതവും കാണിക്കുകയാണ് ഈ ചിത്രം ചെയ്തത്. ഫ്രഞ്ച് വിമതസേനയുടെ നേതാവായിരുന്ന ഷാൾ ഡിഗോൾ ഫ്രഞ്ച് പ്രസിഡന്റ് ആയി കനത്ത വിമർശനം ഏറ്റുവാങ്ങിയിരുന്നു സമയത്ത് ഇറങ്ങിയ ചിത്രം അന്ന് ഫ്രഞ്ച് ജനത സ്വീകരിക്കാൻ തയ്യാറായില്ല. പിന്നീട് ഗോൾ-വിരുദ്ധ വികാരങ്ങൾ അടങ്ങിയതിനു ശേഷമാണ് ചിത്രം അതർഹിക്കുന്ന രീതിയിൽ അംഗീകരിക്കപ്പെട്ടത്.