The Chorus
ദ കോറസ് (2004)

വർഷം 1949.

സമൂഹം പ്രശ്‌നക്കാരെന്ന് മുദ്രകുത്തിയ ഒരുകൂട്ടം കുട്ടികളെ പാർപ്പിച്ചിരിക്കുന്ന Fond de l’Étang (ഫ്രഞ്ച് ഭാഷയിൽ “ആഴക്കുളം” എന്നർത്ഥം) സ്കൂളിലേക്ക് പുതിയ വാർഡനായി വരികയാണ്, അതുവരെ ചെയ്ത എല്ലാ ജോലികളിലും പരാജയം മാത്രം രുചിച്ച, ക്ലമൻ്റ് മാത്യു എന്ന സംഗീതജ്ഞൻ.

പ്രയാസമേറിയ ശിക്ഷാമുറകളും, കർക്കശമായ അധ്യാപന ശൈലിയും കൊണ്ട് കുട്ടികളെ വലയ്ക്കുന്ന മിസ്റ്റർ റഷിനാണ് സ്കൂളിൻ്റെ പ്രിൻസിപ്പൾ. “പ്രശ്നക്കാരായ” കുട്ടികൾ യാതൊരു ദയയുമർഹിക്കുന്നില്ല എന്ന വിശ്വാസമാണ് അയാളെ മുന്നോട്ട് നയിക്കുന്നത്.

കഠിനമേറിയ ശിക്ഷാ രീതികൾ കൊണ്ടല്ല, മറിച്ച് സ്നേഹത്തിൻ്റെയും, കരുണയുടെയും, ഭാഷയിൽ കുട്ടികളെ ചേർത്തു പിടിക്കേണ്ടവരാണ് അധ്യാപകർ എന്ന തത്ത്വമാണ് മാത്യുവിന്. തുടർന്ന് ഈ ലക്ഷ്യത്തിനായി അദ്ദേഹം നടത്തുന്ന പരിശ്രമങ്ങളാണ് ചിത്രത്തിൻ്റെ കാതൽ.

അധ്യാപക വിദ്യാർത്ഥി ബന്ധം, ദയ, മനുഷ്യത്വം, പ്രത്യാശ, സംഗീതത്തിൻ്റെ പരിവർത്തന ശക്തി, സൗഹൃദ ബന്ധങ്ങൾ, തുടങ്ങി ഒട്ടേറെ ആശയങ്ങൾ ചിത്രം ചർച്ച ചെയ്യുന്നുണ്ട്.

Christopher Barratier ൻ്റെ കയ്യടക്കം നിറഞ്ഞ സംവിധാനവും, ഫ്രഞ്ച് ഗ്രാമങ്ങളുടെ ഭംഗിയൊപ്പിയെടുത്ത ഛായാഗ്രഹണവും, Bruno Coulais ൻ്റെ ഹൃദയഹാരിയായ സംഗീതവും, അഭിനേതാക്കളുടെ മികച്ച പ്രകടനങ്ങളും ചിത്രത്തെ ഒരു ക്ലാസിക്കായി മാറ്റിയെടുക്കുന്നു. പ്രേക്ഷക നിരൂപക പ്രശംസകൾ ഒരുപോലെ നേടിയെടുത്ത ചിത്രം, അക്കൊല്ലം ഏറ്റവും കൂടുതൽ കളക്ഷൻ നേടിയ ഫ്രഞ്ച് ചിത്രമായിരുന്നു. കൂടാതെ മികച്ച വിദേശ ചിത്രം, സംഗീതം തുടങ്ങിയ വിഭാഗങ്ങളിൽ ഓസ്കാർ നോമിനേഷൻ നേടുകയും ചെയ്തു.