Dhurandhar
ധുരന്ധർ (2025)

‘ഉറി: ദ സർജിക്കൽ സ്ട്രൈക്ക്‘-ന് ശേഷം ആദിത്യ ധർ സംവിധാനം ചെയ്ത ബ്രഹ്മാണ്ഡ സ്പൈ ത്രില്ലർ ചിത്രമാണ് ‘ധുരന്ധർ‘.

2001-ലെ പാർലമെന്റ് ആക്രമണത്തിനെ തുടര്‍ന്ന് പാകിസ്ഥാനിലെ ഭീകരവാദ ശൃംഖലയെ തകർക്കാൻ ഇന്ത്യൻ ഇന്റലിജൻസ് ബ്യൂറോ തീരുമാനിക്കുന്നു. ഇതിനായി ‘ഹംസ’ എന്ന പേരിൽ കറാച്ചിയിലെത്തുന്ന നായകൻ, അവിടെയുള്ള ലയാരി ഗ്യാങ്ങിന്റെ വിശ്വസ്തനായി മാറുന്നതും, അതിലൂടെ ഇന്ത്യക്കെതിരായ ഭീകരവാദ പ്രവർത്തനങ്ങളുടെ വേരറുക്കാൻ ശ്രമിക്കുന്നതുമാണ് കഥ.

ഒരു സാധാരണ ആക്ഷൻ സിനിമ എന്നതിലുപരി, ഗ്യാങ്സ്റ്റർ ഡ്രാമയുടെ സ്വഭാവമുള്ള, ഗ്യാങ് വാറുകളും, രാഷ്ട്രീയ നീക്കങ്ങളും, ചാരവൃത്തിയുടെ സസ്പെൻസും ചേർന്ന ചിത്രം, രണ്ടാം ഭാഗത്തിനായുള്ള ആകാംക്ഷ വർദ്ധിപ്പിച്ചു കൊണ്ടാണ് അവസാനിക്കുന്നത്.

ഛായാഗ്രഹണം, സംഗീതം, എഡിറ്റിംഗ്, സംവിധാനം തുടങ്ങിയ എല്ലാ മേഖലകളിലും മികവ് പുലര്‍ത്തുന്ന ചിത്രത്തിന്റെ നട്ടെല്ല് രൺവീർ സിംഗ്, അക്ഷയ് ഖന്ന, ആർ. മാധവൻ, സഞ്ജയ് ദത്ത്, അർജുൻ രാംപാൽ എന്നിവരുടെ ഗംഭീര പ്രകടനങ്ങളാണ്. സ്പൈ ഏജന്റുമാർക്ക് സാധാരണ നൽകാറുള്ള ഗ്ലാമർ പരിവേഷം മാറ്റി, അവരുടെ ജീവിതത്തിലെ വെല്ലുവിളികളും ഏകാന്തതയും സംവിധായകൻ ഭംഗിയായി വരച്ചുകാട്ടി.

ഇന്ത്യയിൽ ഏറ്റവും കൂടുതൽ കളക്ഷൻ നേടുന്ന ഹിന്ദി സിനിമയായി മാറിയ ചിത്രം, ആഗോളതലത്തിൽ ₹1300 കോടിയിലധികം നേടി, ഇന്ത്യൻ സിനിമാ ചരിത്രത്തിലെ തന്നെ ഏറ്റവും വലിയ വിജയങ്ങളിൽ ഒന്നായി മാറി.