Jab Tak Hai Jaan
ജബ് തക് ഹെ ജാൻ (2012)

ലണ്ടൻ നഗരത്തിലേക്ക് കുടിയേറിയ കഠിനാധ്വാനിയായ ചെറുപ്പക്കാരനാണ്, സമർ ആനന്ദ്. തുടർന്ന്, സമർ യാദൃശ്ചികമായി, വളരെയധികം ദൈവ വിശ്വാസിയായ മീരയെന്ന പെൺകുട്ടിയെ കണ്ടുമുട്ടുന്നു, പിന്നീടവർ പ്രണയത്തിലാകുന്നു.
ഒരിക്കൽ മീരയുടെ മുൻപിൽ വെച്ച് സമർ ഗുരുതരമായൊരു അപകടത്തിൽ പെടുന്നു. സമറിനുണ്ടായ അപകടത്തിന്റെ കാരണം തന്റെ സാന്നിധ്യമാണെന്ന് ഉറച്ചു വിശ്വസിക്കുന്ന മീര, സമറിന്റെ ആയുസ്സ് നീട്ടി കൊടുക്കുകയാണെങ്കിൽ താൻ എന്നന്നേക്കുമായി സമറിനെ ഉപേക്ഷിക്കാൻ തയ്യാറാകുമെന്നു, ദൈവത്തിനെ മുൻ നിർത്തി ശപഥം ചെയ്യുന്നു.

സുഖം പ്രാപിച്ച സമർ മീരയുടെ തീരുമാനങ്ങളിലും അകൽച്ചയിലും വളരെയധികം അസ്വസ്ഥനാകുന്നു, മീരയുടെ അസാന്നിധ്യമാണ് തന്റെ ആയുസ്സിന്റെ ബലമെങ്കിൽ, ഇനിയുള്ള ജീവിതം മരണത്തിന്റെ കൈ വെള്ളയിലായിരിക്കുമെന്നു സമർ ദൈവത്തിനോട് വെല്ലുവിളിക്കുന്നു. വർഷങ്ങൾക്കിപ്പുറം ഇന്ത്യൻ ആർമിയിലെ “bomb disposal Chief” ആകുന്ന സമർ ആനന്ദ്, ഒരു സുരക്ഷാ മാർഗ്ഗങ്ങളുമില്ലാതെ ബോംബുകൾ നിർവീര്യമാക്കുന്നതിലൂടെ “the man who cannot die” എന്ന വിശേഷണം സ്വന്തമാക്കുന്നു. അവിചാരിതമായി സമറിന്റെ കഥയറിയുന്ന ഡിസ്‌കവറി ചാനൽ റിപ്പോർട്ടർ അകിര റായ്‌, സമറിന്റെ പ്രണയ കഥയിലെ നിഗൂഢതകളുടെ ചുരുളഴിക്കാൻ ശ്രമിക്കുന്നു. തന്റെ വെല്ലുവിളിയിൽ സമർ ജയിക്കുമോ, അതോ സമറിന്റെ പ്രണയത്തിന് മുന്നിൽ ദൈവം കീഴടങ്ങമോ?