Marlina the Murderer in Four Acts
മർലിനാ ദി മർഡറെർ ഇൻ ഫോർ ആക്ടസ് (2017)

തികച്ചും സ്ത്രീവിരുദ്ധമായ സാമൂഹിക സാഹചര്യങ്ങളോട് ഏറ്റുമുട്ടേണ്ടി വരുന്ന മർലീന എന്ന യുവവിധവയുടെ കഥ പറയുന്ന മനോഹരമായ ഇൻഡോനേഷ്യൻ സിനിമയാണ് മർലീന ദ മർഡറർ: ഇൻ ഫോർ ആക്ട്സ്. ഇൻഡോനേഷ്യയിലെ അറിയപ്പെടുന്ന സംവിധായികയായ മൗലി ജയസൂര്യ സംവിധാനം ചെയ്ത ഈ ചിത്രം ഒരു വാർപ്പു മാതൃകകളെയും പിന്തുടരുന്നില്ല. ലളിതവും സൂക്ഷ്മവുമായ ഉള്ളടക്കവും ആഖ്യാനവുമാണ് 2017 ലെ കാൻ ഫിലിം ഫെസ്റ്റിവലിൽ Directors Fortnights section ൽ പ്രദർശിപ്പിച്ച ഈ സിനിമയുടെ പ്രത്യേകത.

ഇന്തോനേഷ്യയിലെ വിദൂരമായ ഉൾനാടൻ ഗ്രാമമായ സുംബയിൽ താമസിക്കുന്ന മർലീന എന്ന യുവവിധവയുടെ വസ്തുവകകൾ കവർന്ന് അവളെ ബലാത്കാരം ചെയ്യാനെത്തുന്നു, മാർക്കസ് എന്ന ഗുണ്ടാത്തലവനും കൂട്ടുകാരും. തന്ത്രപരമായി അവരെ കൊലപ്പെടുത്തി, തന്നെ ബലാത്സംഗം ചെയ്ത മർകസിൻ്റെ തല അറുത്തെടുത്ത്, മർലീന അതുമായി നീതി തേടി ഇറങ്ങുന്നു. കൂട്ടക്കൊലയിൽ നിന്ന് രക്ഷപെട്ട രണ്ട് സംഘാംഗങ്ങൾ അവളുടെ പിറകെയുണ്ട്.

ആ യാത്രയിൽ മർലീന കണ്ടു മുട്ടുന്ന നോവി എന്ന ഗർഭിണി, യോഹാന എന്ന വൃദ്ധ, തോപൻ എന്ന പെൺകുട്ടി തുടങ്ങിയ കഥാപാത്രങ്ങളിലൂടെ കഥ ചുരുൾ നിവരുന്നു. ഒരു റോഡ് മൂവിയെന്നോ, ത്രില്ലർ എന്നോ, ഫെമിനിസ്റ്റ് സിനിമ എന്നോ ഒക്കെ വേണമെങ്കിൽ ഈ സിനിമയെ വിശേഷിപ്പിക്കാം. എന്നാൽ അവയിലൊന്നും ഒതുങ്ങുന്നതുമല്ല ഈ സിനിമ. ഇന്തോനേഷ്യയുടെ വിജനവും വിശാലവുമായ ഭൂപ്രകൃതി പകർന്നു തരുന്ന ദൃശ്യഭംഗിയും, അതിമനോഹരമായ പശ്ചാത്തല സംഗീതവും ഈ ചിത്രത്തിന്റെ മിഴിവ് വർദ്ധിപ്പിക്കുന്നു.