Porco Rosso
പോര്‍ക്കോ റോസോ (1992)
എംസോൺ റിലീസ് – 3477
| ഭാഷ: | ജാപ്പനീസ് |
| സംവിധാനം: | Hayao Miyazaki |
| പരിഭാഷ: | എൽവിൻ ജോൺ പോൾ |
| ജോണർ: | അഡ്വെഞ്ചർ, അനിമേഷൻ, കോമഡി |
1992-ല്‍ ഹയാവോ മിയസാക്കിയുടെ സംവിധാനത്തില്‍ “സ്റ്റുഡിയോ ജിബ്ലി” പുറത്തിറക്കിയ ജാപ്പനീസ് അനിമേറ്റഡ്‌ ചിത്രമാണ് “പോര്‍ക്കോ റോസോ”. മിയസാക്കിയുടെ തന്നെ “ഹിക്കൊടെയ് ജിഡായ്” എന്ന മാങ്കയെ ആസ്പദമാക്കി നിര്‍മ്മിച്ച ചിത്രം ജപ്പാന്‍ എയര്‍ലൈന്‍സില്‍ കാണിക്കാനുള്ള ഒരു ഷോര്‍ട്ട് ഫിലിമായാണ് തുടക്കം കുറിച്ചത്. പക്ഷേ, പ്രൊഡക്ഷന്‍ വേളയില്‍ സ്റ്റുഡിയോയിലും, ലോകത്തും നടന്ന സന്ദര്‍ഭങ്ങളെ തുടര്‍ന്ന് ചിത്രം ഒരു മുഴുനീള സിനിമയാവുകയുണ്ടായി.
ഒന്നാം ലോക മഹായുദ്ധത്തിനും രണ്ടാം ലോക മഹായുദ്ധത്തിനും ഇടയിലുള്ള കാലഘട്ടത്തിലാണ് പോര്‍ക്കോ റോസോയിലെ കഥ നടക്കുന്നത്. ഒന്നാം ലോക മഹായുദ്ധത്തില്‍ ഇറ്റാലിയന്‍ എയര്‍ ഫോഴ്സില്‍ ഉണ്ടായിരുന്ന ഒരു പൈലറ്റായിരുന്നു മാര്‍ക്കോ പഗോ. ഒരു ശാപം മൂലം മാര്‍ക്കോയ്ക്ക് ഒരു പന്നിയുടെ മുഖം വരുന്നു. ഇതേ തുടര്‍ന്ന് മാര്‍ക്കോയെ എല്ലാവരും പോര്‍ക്കോ റോസോ എന്ന് വിളിച്ചുതുടങ്ങുന്നു. യുദ്ധത്തിന് ശേഷം അഡ്രിയാറ്റിക് കടലില്‍ തന്റെ സീപ്ലെയിനും ഓടിച്ച് ഒരു ബൗണ്ടി ഹണ്ടറായി കഴിയുകയാണ് പോര്‍ക്കോ. പോര്‍ക്കോയുടെ ശല്യം സഹിക്കവയ്യാതെ കൊള്ളക്കാര്‍ എല്ലാവരും കൂടെ പോര്‍ക്കോയെ ഒതുക്കാനായി കര്‍ട്ടിസ് എന്നൊരു അമേരിക്കന്‍ പൈലറ്റിനെ ഏര്‍പ്പാടാക്കുന്നു. ഈ സമയത്താണ് തന്റെ വിമാനത്തിന് അറ്റകുറ്റപ്പണികള്‍ ചെയ്യാന്‍ വേണ്ടി പോര്‍ക്കോ ഒരു പഴയ സുഹൃത്തിനെ കാണാനായി മിലാനില്‍ പോകുന്നത്. ഇതിന്റെ ഇടയില്‍ കൂടി ഇറ്റലിയില്‍ എത്തിയ പോര്‍ക്കോയെ ഭരണത്തില്‍ വന്ന ഫാസിസ്റ്റ് സര്‍ക്കാര്‍ ആളെ തിരിച്ച് പട്ടാളത്തിലെടുക്കുക അല്ലെങ്കില്‍ അറസ്റ്റ് ചെയ്തു തടവിലാക്കുക എന്ന ലക്ഷ്യത്തോട് കൂടി കരുക്കള്‍ നീക്കുന്നു. ഇതില്‍ നിന്നെല്ലാം പോര്‍ക്കോക്ക് രക്ഷപ്പെടാന്‍ സാധിക്കുമോ എന്നതാണ് സിനിമയുടെ ഇതിവൃത്തം.
