The Girl Who Leapt Through Time
ദ ഗേൾ ഹൂ ലെപ്റ്റ് ത്രൂ ടൈം (2006)

സമയത്തിന്റെ ഒരു പോയിന്റിൽ നിന്ന് മറ്റൊരു പോയിന്റിലേക്ക് സഞ്ചരിക്കുന്ന പ്രവൃത്തിയാണ് ടൈം ലീപ്. ടൈം ട്രാവൽ പോലെ അതിനിടയിൽ നടന്ന സംഭവങ്ങളൊക്കെ ഇല്ലാതാകുന്നു. എന്നാൽ ടൈം ട്രാവൽ എന്ന ആശയത്തിൽ നിന്നും തികച്ചും വ്യത്യസ്തമാണ് ടൈം ലീപ്പ്. ഭൂതകാലത്തിലേക്കോ ഭാവിയിലേക്കോ വളരെ ദൂരം ട്രാവൽ ചെയ്യുന്നതിനുപകരം തൊട്ടു മുൻപ് നടന്നതോ നടക്കാൻ പോകുന്നതോ ആയ സംഭവങ്ങൾ മാറ്റുന്നതിന് സമയത്തിന് തൊട്ട് പിന്നിലേക്ക് സഞ്ചരിക്കുന്ന ചെറിയൊരു “ചാട്ടം” മാത്രമാണ് ആണ് ടൈം ലീപ്പ്. ഈ ഒരാശയത്തിൽ നിന്നും പ്രചോദനം ഉൾക്കൊണ്ട് 1967 ൽ യസുതക സുത്സുയിയുടെ രചനയിൽ പുറത്തിറങ്ങിയ നോവലിനെ ആധാരമാക്കി അതേ പേരിൽ 2006-ൽ മമോരു ഹൊസോദ സംവിധാനം ചെയ്ത ഒരു ജാപ്പനീസ് ആനിമേറ്റഡ് സയൻസ് ഫിക്ഷൻ റൊമാൻസ് ചിത്രമാണ് ദ് ഗേൾ ഹു ലെപ്റ്റ് ത്രൂ ടൈം.

വികൃതിക്കാരിയായ ഹൈസ്‌കൂൾ പെൺകുട്ടിയാണ് മകോടൊ കോന്നോ. ഒരിക്കൽ സ്‌കൂളിലെ സയൻസ് ലാബിൽ വെച്ച് അവൾക്ക് ചെറിയൊരു ആക്‌സിഡന്റ് സംഭവിക്കുന്നു. അപ്രതീക്ഷിതമായി നടന്ന ആ ആക്‌സിഡന്റിലൂടെ ടൈം ലീപ്പ് ചെയ്യാനുള്ള ശക്തി അവൾക്ക് കിട്ടുന്നു. ആദ്യമൊക്കെ അവൾ ആ പുതിയ ശക്തി നിസ്സാര കാര്യങ്ങൾക്ക് വേണ്ടിയാണ് ഉപയോഗിച്ചിരിക്കുന്നത്- ക്ലാസ്സിൽ നേരത്തേ ചെല്ലാനും, നല്ല മാർക്ക് നേടാനും, രസകരമായ നിമിഷങ്ങൾ വീണ്ടും വീണ്ടും കൊണ്ടുവരാനും അങ്ങനെ പലതും. എന്നാൽ ടൈം ലീപ്പ് ചെയ്യുമ്പോൾ, അവളുടെ ചുറ്റുമുള്ള പലരും അതിന്റെ അനന്തരഫലങ്ങൾ അനുഭവിക്കുണ്ടെന്ന് അവൾ മനസിലാക്കുന്നു.

പിന്നീട് ആ പ്രശ്നങ്ങളൊക്കെ പക്വതയോടെ പരിഹരിക്കാൻ ശ്രമിക്കുമ്പോൾ മകോടൊയ്ക്ക് നേരിടേണ്ടി വരുന്ന ബുദ്ധിമുട്ടുകളാണ് സംവിധായകൻ കാണിക്കുന്നത്. സൗഹൃദത്തിനും , പ്രണയത്തിനും തുല്യ പ്രാധാന്യം നൽകിയിരിക്കുന്ന ഈ സയൻസ് ഫിക്ഷൻ, അനിമേ പ്രേമികൾ നിർബന്ധമായും കണ്ടിരിക്കേണ്ട ചിത്രമാണ്.