The Story of Qiu Ju
ദ സ്റ്റോറി ഓഫ് ക്യൂ ജൂ (1992)

ക്യൂ ജൂ എന്ന പെൺകുട്ടി നമ്മെ ഒരു ചൈനീസ്‌ ഉൾനാടൻ ഗ്രാമത്തിലേക്ക് കൂട്ടിക്കൊണ്ടുപോകുകയാണ്. കല്യാണം കഴിഞ്ഞിട്ട് അധികം ആയില്ലെങ്കിലും അവൾ എല്ലാവരുടെയും പ്രിയപ്പെട്ടവൾ ആയിക്കഴിഞ്ഞു. അതിനിടെ ക്യു ജുവിന്റെ ഭർത്താവും ഗ്രാമ പ്രമുഖനും തമ്മിലൊരു അടിപിടിയുണ്ടാകുന്നു. പരിക്കേറ്റ ഭർത്താവിനെ ആശുപത്രിയിൽ എത്തിക്കാൻ മലകൾ താണ്ടി പോകുന്നത് ഗർഭിണിയായ അവൾ തന്നെയാണ്. ഭർത്താവിന്റെ മർമ്മം തന്നെ നോക്കി മർദ്ദിച്ച ഗ്രാമ പ്രമുഖൻ മാപ്പ് പറയണമെന്ന നിലപാടിലാണ് അവൾ. പക്ഷെ ഗ്രാമ പ്രമുഖൻ അവളേയും അപമാനിക്കുന്നു. നീതി തേടി ചൈനീസ്‌ സർക്കാർ സംവിധാനത്തിന്റെ ഓരോ തട്ടിലും കയറിയിറങ്ങുകയാണ് ക്യു ജു. പക്ഷെ അവളുടെ വയറും ഗ്രാമത്തിലെ എതിർപ്പും വലുതാകുകയാണ്. എന്താകും ഈ പ്രശ്നത്തിന് പരിഹാരം ?അവാർഡുകൾ വാരിക്കൂട്ടിയ ചിത്രം.