Sherlock Jr.
ഷെര്‍ലക്ക് ജൂനിയര്‍ (1924)

അമേരിക്കൻ നടനും സംവിധായകനുമായ ബസ്റ്റർ കീറ്റൺ സംവിധാനം ചെയ്ത്, മുഖ്യ കഥാപാത്രമായി അഭിനയിച്ച ചിത്രമാണ് 1924 ൽ പുറത്തിറങ്ങിയ ഷെർലക്ക് ജൂനിയർ. തൻ്റെ കാമുകിയുടെ പിതാവിൻ്റെ വാച്ച് മോഷ്ടിച്ചുവെന്ന കുറ്റം ചുമത്തപ്പെട്ട, ഒരു സിനിമ തിയറ്റർ ഓപ്പറേറ്റർ, തൻ്റെ നിരപരാധിത്വം തെളിയിക്കാൻ നടത്തുന്ന ശ്രമങ്ങളാണ് ചിത്രത്തിൻ്റെ കാതൽ.

ഈ സിനിമയിലെ ക്യാമറ ട്രിക്കറി, ഒപ്റ്റിക്കൽ ഇഫക്ടുകൾ, എഡിറ്റിംഗ്, ഛായാഗ്രഹണം തുടങ്ങിയ മേഖലകളിൽ കീറ്റൺ നടത്തിയ പരീക്ഷണങ്ങളും പുതുമകളും, പിൽക്കാലത്തെ ആധുനിക സിനിമാ നിർമ്മാണത്തിന് പല സംഭാവനകളും നൽകിയിരുന്നു.

“സിനിമയ്ക്കുള്ളിലെ സിനിമ” എന്ന നൂതനാശയം ഒരു നൂറ്റാണ്ട് മുന്നേ, അതും യാതൊരു CGI, ഡിജിറ്റൽ ഇഫക്ടുകൾ തുടങ്ങിയവയുടെ സഹായമില്ലാതെ, പ്രാക്ടിക്കൽ ഇഫക്ടുകൾ കൊണ്ട് മാത്രം സാധിച്ചെടുത്ത മികവ്, കീറ്റൻ്റെ പ്രതിഭയ്ക്ക് സാക്ഷ്യം വഹിക്കുന്നു.

മുഖത്തെ കൂട്ടുപിടിക്കാതെയുള്ള അഭിനയ ശൈലിയും (deadpan/സ്റ്റോൺ ഫേസ് ആക്ടിംഗ് എന്ന് പിൽക്കാലത്ത് അറിയപ്പെട്ട), ശരീര ചേഷ്ടകളും സ്വന്തം ജീവൻ പോലും പണയം വെച്ച് നടത്തുന്ന സംഘട്ടന രംഗങ്ങളും കൊണ്ട് ഹാസ്യ രംഗങ്ങൾ ഫലപ്രദമായി പ്രേക്ഷകരിലേക്ക് എത്തിക്കുന്നതിൽ കീറ്റൺ വിജയിച്ചിട്ടുണ്ടെന്ന് നിസ്സംശയം പറയാം.

BBC, സൈറ്റ് ആൻഡ് സൗണ്ട്, അമേരിക്കൻ ഫിലിം ഇൻസ്റ്റിറ്റ്യൂട്ട്, ടൈം മാഗസിൻ, തുടങ്ങിയവർ പുറത്തിറക്കിയ എക്കാലത്തെയും മികച്ച 100 സിനികളുടെ പട്ടികയിൽ, ഷെർലക്ക് ജൂനിയറും ഉൾപ്പെട്ടിട്ടുണ്ട്.

കാലാതീതമായ വിഷ്വൽ കോമഡികളും, പ്രാക്ടിക്കൽ ഇഫക്ടുകളും, മെറ്റാ – സിനിമാറ്റിക് തീമുകളും, നവീനമായ സിനിമാറ്റിക് ഭാഷയും കൊണ്ട് ഈ ക്ലാസിക്ക് ചിത്രം, ഒരു നൂറ്റാണ്ടിനിപ്പുറവും അനേകം സംവിധായകർക്ക് വഴികാട്ടിയായി നിലകൊള്ളുന്നു.